Ibrahimaj: Nga 1 korriku nis programi Dyfisho sipërmarrjen tënde, 250 mln euro për bizneset
Qeveria lançon një skemë të re financimi me kredi të lehtësuara dhe garanci sovrane për SME-të.
Ministrja e Ekonomisë dhe Inovacionit, Delina Ibrahimaj, njoftoi pas mbledhjes së qeverisë se më 1 korrik do të nisë zbatimi i programit “Dyfisho sipërmarrjen tënde”, një instrument i ri mbështetës që synon të përmirësojë aksesin në financim për bizneset shqiptare dhe të nxisë zgjerimin e aktivitetit ekonomik.
Sipas Ibrahimajt, programi do të ketë në dispozicion një fond prej 250 milionë eurosh dhe synon të mbështesë kryesisht ndërmarrjet e vogla dhe të mesme, duke u ofruar mundësi financimi me kushte më të favorshme se ato të tregut.
Garanci sovrane prej 30 milionë eurosh
Një nga elementët kryesorë të skemës është garancia sovrane në vlerën 30 milionë euro, e cila do të shërbejë për uljen e riskut të kreditimit për bankat tregtare. Përmes këtij mekanizmi, bizneset do të kenë mundësi të përfitojnë kredi me norma interesi të reduktuara, që sipas qeverisë do të variojnë nga 2 deri në 3 për qind.
Ministrja Ibrahimaj theksoi se programi synon jo vetëm të lehtësojë financimin e sipërmarrjeve, por edhe të informojë bizneset mbi mundësitë e reja të financimit dhe të kontribuojë në rritjen e produktivitetit në ekonomi.
Mbështetje për bizneset e vogla dhe të mesme
Përmes programit “Dyfisho sipërmarrjen tënde”, ndërmarrjet e vogla dhe të mesme do të kenë mundësi të financojnë investimet dhe zgjerimin e aktivitetit të tyre me kosto më të ulëta financiare. Programi do të mbështetet nga qeveria përmes garancisë sovrane dhe një fondi grantesh që do të ndihmojë bizneset në hartimin e projekteve që do të paraqiten për financim.
Qeveria synon që kjo skemë të rrisë mundësitë e aksesit në kredi për sipërmarrjet që kanë vështirësi në sigurimin e financimit tradicional, duke krijuar më shumë mundësi për investime dhe zhvillim.
Fokus te agrobujqësia dhe agroturizmi
Disa ditë më parë, gjatë ceremonisë së nënshkrimit të marrëveshjes mes institucioneve shtetërore dhe bankave të nivelit të dytë, kryeministri Edi Rama deklaroi se kjo linjë kredie me interesa të ulëta dhe garanci sovrane është menduar për t’i dhënë më shumë frymëmarrje biznesit të vogël dhe të mesëm, veçanërisht sektorëve të agrobujqësisë dhe agroturizmit.
Sipas Ramës, normat e interesit do të jenë minimale, nga 2 deri në 3 për qind, ndërsa garancia sovrane do të mbulojë nga 30 deri në 70 për qind të riskut të kredisë, në varësi të vlerësimit të secilit projekt dhe nivelit të riskut nga institucionet financiare. Autoritetet presin që programi të ndikojë pozitivisht në rritjen e investimeve private, zgjerimin e aktivitetit ekonomik dhe krijimin e mundësive të reja për bizneset në të gjithë vendin.
k.jpg)